Женско фитнес студио

Тип на проект: Комерцијален објект

Ова женско фитнес студио е замислено како простор каде движењето има јасна сцена – без визуелен шум и без непотребни пречки. Наместо класичен gym исполнет со машини, концептот се фокусира на нешто што често се занемарува: просторот помеѓу нив.

Бетонските ѕидови создаваат индустриска основа, додека контрастот помеѓу црниот гумен под и сивиот линолеум ги дефинира функционалните зони. Централниот рецепциски пулт со метална мрежеста конструкција е визуелен фокус на влезниот простор, надополнет со лесна метална рамка со интегрирано осветлување.

Розовиот неонски знак „Girl’s spot“ внесува карактер и идентитет, додека внимателно поставеното огледало и организираната зона за реквизити создаваат чувство на ред и просторност. Отворениот распоред овозможува доволно слободна површина за динамични тренинзи.

Овој проект покажува дека добриот фитнес дизајн не се мери со количината на опрема, туку со квалитетот на просторот што му дозволува на телото да се движи.